તા. ૨૪-૫-૦૭

આજની પ્રેરણા
આજના મૂર્તિપ્રતિષ્ઠા મહોત્સવના દિને સ્વામીશ્રી અલ્પાહાર કરવા બિરાજ્યા હતા. સામે બેઠેલા અક્ષરવત્સલ સ્વામી વાતો કરી રહ્યા હતા. તેઓએ સ્વામીશ્રીએ જ્યાં જ્યાં મંદિરો કર્યા છે તે મંદિરોની પ્રવૃત્તિ અને આધ્યાત્મિકતાને લીધે દેશ અને વિદેશમાં ભણતા યુવાન વિદ્યાર્થીનું કુસંગ થકી કઈ કઈ રીતે રક્ષણ થાય છે એના દાખલાઓ આપીને કહ્યું, 'આપે મંદિરો કરીને ખરેખર હિન્દુઓની મોટી રક્ષા કરી છે.'
સ્વામીશ્રી તરત જ કહે, 'જોગીબાપાનો સંકલ્પ હતો કે બધા દેશોમાં સત્સંગ કરાવવો છે. એ તો જાપાન અને રશિયાની પણ વાત કરતા.'
સ્વામીશ્રી કહે, 'સંકલ્પ જેણે કર્યો છે એ જ સાકાર કરે છે ને.' સ્વામીશ્રીની આ સહજ દાસત્વભક્તિ છે.
આજની વાત
દારેસલામ ભાગ્યશાળી છે. કારણ કે, આજે ત્રીજીવાર અહીં સ્વામીશ્રીના હસ્તે જ મૂર્તિપ્રતિષ્ઠા થઈ છે. ૧૯૭૭માં સ્વામીશ્રીએ અહીં પ્રથમવાર પ્રતિષ્ઠા કર્યા પછી ૧૯૯૯માં આરસની મૂર્તિઓની પ્રતિષ્ઠા થઈ અને આજે વાઘા પહેરાવાય એવી આરસની મૂર્તિઓની પ્રતિષ્ઠા કરીને સ્વામીશ્રીએ ડંકો માર્યો. સ્વામીશ્રીએ જ આ પ્રસંગે મૂર્તિઓનો મહિમા કહેતાં જણાવ્યું, 'મૂર્તિઓ અદ્‌ભુત બની છે. જાણે કે દર્શન કર્યા જ કરીએ. અંતરની ભક્તિ હોય તો ભગવાન રાજી થાય છે. નાનાં મોટાં બાઈ-ભાઈ બધાંએ રોજ અહીં આવીને દર્શન કરવાં, પ્રાર્થના કરવી અને રવિસભામાં આવવું. જે આવશે એનું કલ્યાણ થશે.'
આજના આ શુભ દિવસે સમગ્ર દેશના ડી.જી.પી. સાઈદી મુએમા દર્શને આવ્યા'તા. સમગ્ર દેશના ૩૦,૦૦૦ પોલીસોના તેઓ વડા છે. સ્વામીશ્રીને તેઓ ખૂબ આદરથી મળ્યા અને પ્રાર્થના કરી કે અમારો દેશ ખૂબ પ્રગતિ કરે - નાની મોટી તકલીફો દૂર થાય અને આપની દૃષ્ટિ કાયમ અમારા ઉપર રહે. સ્વામીશ્રીએ પણ તેઓને આશીર્વાદ આપતાં કહ્યું, 'તમે દર્શન માટે આવ્યા છો, એથી આનંદ છે, સમગ્ર દેશ ઉપર ભગવાનની કૃપા થાય, તમારા હસ્તે સારામાં સારું કાર્ય થાય અને દેશમાં શાંતિ થાય. લોકો વધારે કામ કરે એ આશીર્વાદ છે.'
આજે અહીંની સી.સી.એમ. પાર્ટીના ડેપ્યુટી સેક્રેટરી શ્રી યાકા મામ્બી દર્શને આવ્યા'તા. અત્યારે રાજકીય રીતે તેઓની પાર્ટી સત્તા ઉપર છે અને દેશમાં ત્રીજાક્રમે સર્વોચ્ચ સ્થાને તેઓની ગણના છે. સ્વામીશ્રીનાં દર્શન કરતાં તેઓએ કહ્યું, 'આપનાં દર્શન કરીને મને ખૂબ આનંદ થાય છે. આપ અમારા દેશમાં પધાર્યા એ અમારાં સદ્‌ભાગ્ય છે. આપ અમારા દેશ માટે પ્રાર્થના કરો કે દેશ અને સરકાર ખૂબ પ્રગતિ કરે અને દેશમાં શાંતિ રહે. અમારા પ્રેસિડેન્ટે બહુ મોટું કાર્ય ઉપાડ્યું છે, એમાં વિઘ્નો પણ ઘણાં છે, પણ આપ આપની પૂજામાં દરરોજ યાદ કરીને પ્રાર્થના કરજો.
સ્વામીશ્રીએ પણ કહ્યું, 'અમે ચોક્કસ પ્રાર્થના કરીશું, જેથી દેશનો સારામાં સારો વિકાસ થાય.'
આજનો ચમત્કાર
રાત્રે સ્વામીશ્રી જમી રહ્યા પછી અહીં વસતા ઘણા ભાવિકો ભેદભાવ વગર સ્વામીશ્રીના આશિષ લેવા ઊમટ્યા હતા. જેમાં અહીંના મુસ્લિમ જમાતના ચેરમેન શ્રી રહેમત્તુલા પણ હતા. તેઓ સ્વામીશ્રી પાસે આવ્યા. સ્વામીશ્રીનો હાથ આંખે અડાડ્યો અને માથે પણ મુકાવ્યો. તેઓએ પોતાની વાત કરતાં કહ્યું, 'ત્રણ વર્ષ પહેલાં આપ અહીં પધાર્યા હતા ત્યારે મારી દૃષ્ટિ જતી રહી હતી. એ વખતે હું આપનાં દર્શને આવ્યો'તો. આપે મારી આંખ ઉપર હાથ ફેરવ્યો અને મારી દૃષ્ટિ મને પાછી મળી. હું આપનો ખૂબ ૠણી છું.'